موضوع: معجزات من الله و عبره لمن يعتبر السبت يونيو 09, 2012 3:24 am
بسم الله الرحمن الرحيم
اترددت كتير اكتب تجربتي و اللي حصلي في القسم هنا و دي اول مشاركه ليا فيه بس احساسي كان كبير قوي بان اللي حصلي و اللي مريت بيه مش عادي و لا كانت عبرته ليا انا بس كنت حاسه انه ممكن يكون عبره لناس كتير و نعمه و فضل كبير من الله عليا انا فضلت 6 سنين بعد ما تزوجت مفيش حمل لاني كنت مصابه باكياس دمويه علي المبيضين ( اندومتريوزيس ) و المرض ده بيخلي القدره علي الحمل ضعيفه المهم عملت عمليات و اطفال انابيب و لفيت علي الدكاتره و هيصه كبيره بدون فائده و آخر دكتور رحتله قالي اني لازم اعمل عمليه استئصال للاكياس دي بفتح قيصري لان حجمهم اصبح كبير و لازم يتشالوا فقولتله خلاص هعملها لكن في الشتا يعني كمان اربع شهور كدا اكون بس رتبت حالي و كنا علي مشارف شهر رمضان الكريم و دخل علينا شهر رمضان الكريم و لقيتني بردد دايما في نفسي الحمد لله علي كل حال الحمد لله يا رب انا رضيت بما رضيته انت لي و يشاء العلي القدير ان البريود تتاخر عليا 28 يوم و صمت شهر رمضان من اول يوم لاخر يوم و حسيت بتعب شديد نتيجه احتباس البريود و روحت الصيدليه و حكيت للدكتوره فقالتلي ممكن اديكي حقنه تنزل البريود عليكي حالا و ترتاحي بس من باب الاحتياط روحي اعملي تحليل دم علشان تتاكدي ان مفيش حمل !!! قلتلها حمل ايه ..... انا بقالي ست سنين و عندي مشاكل علي العموم حاضر هعمل اللي عليا و كنت من عادتي بعمل التحاليل في معمل البرج لكن المره دي قلت لزمتها ايه التكاليف و علي اقرب مركز طبي في الجامع اللي جنبنا و روحت انا و زوجي في آخر ليله من ليالي رمضان و صلاه التراويح مقامه في المسجد و طلع التحليل ايجابي و اني فعلا حامل دكتوره التحاليل استغربت من رد فعلنا جدا مكنتش فاهمه ليه انا و زوجي كانت هتجلنا سكته قلبيه من هول المفاجأه !!!!! و اتصلنا بالدكتور بتاعي و احنا في قمه الذهول و السعاده ولانه عارف حالتي قلنا بلاش تتسرعوا فيه اسباب كتير تخلي فيه لخبطه في الهرمونات و تخلي التحليل كانه فيه حمل تعالولي العياده علشان نتاكد بالسونار و طبعا كلامه اصابنا بقلق باحباط رهييييييييب بس كنا حاسين انه لا ربنا اكرمنا و ان فيه باذن الله حمل و في العيادة عملت السونار و الدكتور اتاكد انه فيه كيس حمل و استغرب جدا و قالي كلمه عمري ما نسيتها و لا هنساها قالي الحمل ده دعوه و استجيبت و الحمد لله علي فضله و نعمته الذي رزقني من حملي هذا بابني ابراهيم نور عيني
( سبب ذهول الدكتورانه كان قايلي ان من كتر ضغط الاكياس الدمويه علي الانابيب اتعجنت و انه قدر المستطاع بعمليه منظار حاول يفككها و علشان كده لجأت لعمليه اطفال الانابيب اللي فشلت قبل حملي ده بحوالي سنه )
اللي عايزه اقولهلكم ان مفيش اي واحده تيأس من رحمه الله تعمل اللي عليها و تسعي و ربنا باذن الله هيرزقها و متسمعش لاي حد يقولها حالتك صعبه و لا مستحيل تحملي الرزق بيد الله وحده عارفين بقي ليه كلمه الدكتور ان الحمل ده دعوه و استجيبت اثرت فيا قوي كده علشان فعلا انا مكنتش بسيب اي حد الاقي علي وجهه سمات الصلاح او اي حد اعرف انه علي خير باذن الله غير لما اخليه يدعيلي و كنت اشوف اصعب طلبات امي و اشقها و اعملهلها و في عز تعبي و رضاها عليا اقولها ادعيلي يا ماما و كل لما اشوف طفل في الشارع او المترو او اي مكان اقول بسم الله ما شاء الله لا قوه الا بالله اللهم احفظه و ارزقني بالذريه الصالحه رب لا تذرني فردا و انت خير الوارثين انا عارفه اني طولت عليكم قوي بس فضل الله عليا عظيم و هتتصدموا انتوا كمان لما اقولكم ان مش هوه ده الموضوع الاصلي اللي قصدته دي كانت فقط المقدمه و هتلاقوا موضوعي الاصلي في المشاركه الجايه عارفه هتعملوا كده
بس امانه اللي تقري موضوعي مش هقولها تقيم او ترد دي حاجه متروكه ليكم انا هوصيها تدعيلي ان ربنا سبحانه و تعالي يديم ستره و نعمته عليا و يشفيني انا و ابني و زوجي و يرزقني باخ او اخت لابراهيم انه علي كل شئ قدير و تدعو لابي بالرحمه و المغفره من الله اللهم ارزق كل مشتاقه للامومه بطفل سليم معافي و اجعله من الصالحين و من حفظه كتابك الكريم
موضوع: معجزات من الله و عبره لمن يعتبر 
السبت يونيو 09, 2012 3:24 am
