خلاصة تجاربى مع التبول اللارادى

السلام عليكم ورحمه الله وبركاته
انا بعانى من المشكلة دى وفى بنات كتير زى بس ممكن ميكنش عندهم الجراءة انهم يتكلمو فى الموضوع دة انا طبعا بعانى من الموضوع دة من وانا صغيرة بدون انقطاع وروحت لدكاترة كتير ابتدى من دكتورة الاطفال اللى كنت بتعالج عندها وانا عندى 4 سنين ساعتها قالت لبابا ان ممكن يكون ضهرى السبب وعملولى اشعة على ضهرى وطلع ان عندى عيب خلقى فى ضهرى بس بابا مهتمش بالموضوع دة اوى وكملت متابعة مع الدكتورة دى وكانت بتدينى فوار ودوا اسمه تفرانيل ودة مضاد للاكتئاب العصبى وبرضوا المشكلة متحلتش وكنت زى اى طفلة فى الحضانة ببقى عاوزة اروح الحمام وطبعا الميس مكنتش بترضى فكنت بعمل على نفسى لان كمان مكنتش بلحق نفسى والموقف دة خلانى لما اشتغل فى حضانة حتة لو الطفل بيدلع ومش عاوز يدخل الحمام وعاوز يلعب برة الفصل كنت بوديه الحمام عشان ميعملش كدة وطبعا المشرفة كانت بتزعقلى بس يمكن عشان محدش حس بالموضوع دةوكبرت ودخلت ابتدائى وانا زى منا مستمرة عالتفرانيل ومبيعملش حاجة واهلى بيحسبو انى بستهبل وفى 5 ابتدائى بابا ودانى لاول دكتور مسالك بولية وطلب اشعة عالمثانة وقلى المثانة عندك منكمشة وادنى يوربيان وتفرانيل وقلى لو ماخدتيش الدوا حعملك ترقيع فى المثانة وحتعملى بيبى من بطنك وبرضوا مجبش نتيجة وفى اولى اعدادى سافرنا مطروح وبابا راح للعطار هناك وساله وادانى بلح بلوط ومكونات تانية اشربه على مية قبل مانام كان طعمه وحش اوى وبرضوا مبيجيبش نتيجة قله فى حل بابا قله خير قله ان حد يعاشرها من عصبها يعنى يكون حد من ولاد عمى على اساس ان ممكن يكون نفسيا او تسيبوها كدة لحد ماتكبر وتتجوز وساعتها حتخف بابا طبعا رفض المهم اخدت البلوط فترة ومعملش حاجة وفى 2 اعدادى روحت لدكتور فى مستشفى ابو الريش اسسمه دكتور مختار رحتله وادانى مهدى وتفرانيل وطلب ان اعمل ديناميكية تبول ماما سالته بتتعمل ازى قلها حتاخد حقنة صبغة هو طلبها بعد كام شهر من العلاج عشان برضو مجبش فايدة ماما راحت قالت لبابا وكبرت الموضوع وخوفته من الديناميكية فبابا مودينشش تانى للدكتور دة واعدت 4 او خمس سنين لحد مادخلت اولى جامعة وقريت فى الجورنال عن ان مستضيفين دكتور مخ واعصاب واوعية دموية بيتكلم عن جراحة فى العمود الفقرى بيرفع العمود عن المثانة لان ممكن يكون ضاغط عليها وجبت اسمه وعنوانه وحجزت عنده كان فى مصر الجديدة ورحتله وكشف عليا وقال لبابا هى اعصابها شبه ميتة بس انا ححولك لدكتور شاطر اوى فى الكوربة مسالك بولية وروحت للدكتور دة وبرضوا ادانى منيرين 2 ملجم وتفرانيل واستمريت معاه فترة والدوا برضوا مجبش نتيجة ولما وقفت التفرانييل فجاة طبعا بقالى 15 سنة باخده مبقتش انام ممكن اصحى بالتلات ايام متواصل اعدت سنة مبنمش كويس واعصابى انهارت وبقيت بتخض وبخاف من اقل حاجة وكدة كددة الاعصاب شبه ميته روحت لدكتور باطنى وادانى 100 حقنة فى 10 شهور عشان اقدر امشى على رجلى تانى لان كنت وصلت انى مش بمشى وحكيتله ان عندى تبول ادانى يوربيان وبرضوا معملش نتيجة ولاقيت فتوكة هنا بتحكى عن المنبه اللى بيتمسك فى الاندر واشتريته وكنت بصحى عليه بصعوبة اوى وببابا بقى يزعقلى جامد بس مش ذنبى لان انا مش بحس اصلا بالمية وهى نازلة والمنبه بيرن واعدت سنة بعديها او سنتين مش بتعالج والسنة دى ربنا كرمنى الحمدلله وواحد ربنا يكرمه يارب عارف بالموضوع دة قلى فى دكتور جارى بتاع عظام روحى له هو شاطر اوى مش انتى بتقولى ان فقرات ضهرك معوجة قلتله ايوة المهم جبت عنوانه وهو فى المعادى وروحتله وكشف عليا ولاقى ان عمودى الفقرى معوج وان عصب الضهر للفقرة الرابعة والخامسة مكملش نموه الطبيعى ودة طبعا ياثر وطلع ان فى عرق نسا فى الناحيتيتن وادانى حقن 10 حقن فى 12 يوم ودوا مضاد لالتهاب الاعصاب وطلب اشعة على عمودى الفقرى وعملتها ورحتله وكنتت باخد الحقن واول مرة احس برجلى وانا ماشية انا مكنتش بحس بيها ومكنتش بحس بوجع ضهرى خالص بقيت بحس بنصى التحتانى وبقيت بحس شوية ان عاوزة ادخل الحمام مش بتزنق مرة واحدة قلى ححولك لدكتور مسالك صاحبى او لو عندك دكتور مسالك كويس قلتله لا حولنى للى تبع حضرتك ورحت للدكتور وهو فى المعادى برضوا وقلى مش حديكى اى ادوية غير لما تعملى دينااميكية تبول وتحاليل وظايف كلى وصورة دم واانا عملت من نفسى تحليل سكر والحمدلله مطلعتش عندى سكر وكلمت المستشفى اللى حعمل فيها الديناميكية وقالولى خدى مضاد حيوى سيبروباى قرص كل 12 ساعة اليوم اللى قبل التحليل وخدى حقنة شرجية قبل التحليل ب6 ساعات اخدت السيبروباى وطلعى حبوب وصوت نفسى على كلمت المستشفى وقلتلهم قلى عندك حساسية من حاجة قلتلهم حساسية لبن قلى انزلى حالا خدى امبول ايفلين عشان يوقف مفعوله ونزلت اخدت الحقنة والميعاد اتلغى والمستشفى كلمتنى ادتنى ميعاد جديد وادونى مضاد حيوى جديد كيروم 500 ملجم برضوا قرصين وحقنة شرجية وروحت عملت التحليل هو كان صعب بس الحمدلله بتدخل قسطرة فى المثانة وقسطرة فى فتحة الشرج وتملى مية وتخلينى افضيها وبقيت بعيط صعبان عليا نفسى والنيرس تكلمنى بزعيق وتقلى يعنى انتى مولدتيش قبل كدة قلتلها انا لسه بنت وعملته وطلع حجم مثانتى صغيرة بس بتستوعب عادى وروحت للدكتور وادنى ادوية وابتديت اخف فعلا ولاول مرة فى حياتى الدوا عمل معايا مفعول لمدة شهرين ونص وفجاة كل حاجة اتقلبت وجالى جفاف من قلة المية روحت للدكتور تانى قلى ازاى يحصل كدة بس المرة دى كتبتله كل الاعراض ومتكسفتش من حاجة ودة ساعدنى جامد فى العلاج يعنى اى معلومة ولو هيفة بتنفع دة ساعد اكتر فى العلاج انه عرف ان مثانتى نشاطها زيادة اوى فادنى دوا لتنظيمها وادنى دوا للتبول معلش انا رغيت كتير اوى بس الخلاصة يعنى ان متسبيش حاجة الا لما تتاكدى انها مش السبب يعنى بابا ساب موضوع ضهرى وهو طلع السبب ولفينا كتير اوى وهو الحل قدمنا من زمان هو ربنا لما بيريد بس سيبنا جزء مهم وطلع هو السبب فى كل اللى بيحصل
[/center]